کؤهنه بیر دردیم دِئشیلدی ، آغریلار باشلاندی باشدان
آغلادیم آخشام چاغیندا ، دَفتَریم ایسلاندی یاشدان
یازدیغیم سؤزلَر داغیلدی ، جومله لَر بیر بیر سؤکولدو
آیریلیق دان یاندی خودکار ، شعریمه اودلار تؤکولدو
گوزگولَر قَلبیمده سیندی ، دویغولاردان قان سوزولدو
هَرنَفَس دولدوم پاییزدان ، اَللریم یازدان اوزولدو
چوخ دَرین غَملرده جومدوم ، غَرق اولوب باتدیم اؤزومده
بویلانیب باخدیم اوزاقدان ، کِئچمیشی گؤردوم گؤزومده
بیزامان غَمسیز یاشاردیم ، شادلیغین قَدرین بیله ردیم
قَلبیمی توز باسمامیشدی ، آیناسین هَر گون سیله ردیم
هَرزادی یاددان چیخاردیب ، دونیانی باشدان آتاردیم
گون باتیب اولدوزچیخاندا ، دینجه لیب راحت یاتاردیم
اوندالار انسانلیق عَهدین ، آیریلیق لار بؤلمه میشدی
مهربان اِئللر ایچینده ، مهربانلیق اؤلمه میشدی
یوردومون جَنت باغیندا ، رَهلی گوللر سولمامیشدی
سینه لَر عِشقین یِئریدی ، کینه لَردَن دولمامیشدی
دونیادا چیرکین هَوَسدَن ، سِئوگی لَر آسلانمامیشدی
تانریدان آیریلمامیشدیق ، روحوموز پاسلانمامیشدی
ایندی آمما قیش گَلیبدیر ، دورنالار بوردان کؤچوبلَر
ایللَریم دوزسوز قالیبدیر ، آیلاریم دادسیز کِئچیبلَر
موشَم قاردان ((یاغیشدان )) ، قالمیشام قیتلیق چاغیندا
یارمَنی گؤزدَن سالیبدیر ، سولموشام دوستون باغیندا
تقی نژاد ((یاغیش))
بیست ویکم مهرماه 1398
گوزگو : آینه قیتلیق : کمبود، قحطی
، ,بیر ,لَر ,کؤهنه ,میشدی ,چاغیندا ,کؤهنه بیر ,دردیم دِئشیلدی ,بیر دردیم ,عِشقین یِئریدی ,یِئریدی ،
درباره این سایت